സ്ഫോടനം

സ്ഫോടനം
നിന്റെ ഊര്‍ജ്ജം
ഭ്രമണ പഥം തെറ്റിയ ചിന്തകള്‍
ആവാഹിച്ചാല്‍, നിനക്ക്
ഭ്രാന്ത്......

നിന്റെ ഊര്‍ജ്ജം
മനം നിറഞ്ഞ സ്നേഹത്തെ
ഉദ്ദീപിപ്പിച്ചാല്‍, നിനക്ക്
പ്രണയം.....

നിന്റെ ഊര്‍ജ്ജം
ചപല വികാരങ്ങളില്‍
സന്നിവേശിച്ചാല്‍, നിനക്ക്
കാമം...

നിന്റെ ഊര്‍ജ്ജം
പൊലിഞ്ഞ സ്വപ്നങ്ങളെ
തൊട്ടുണര്‍ത്തിയാല്‍, നിനക്ക്
ദുഃഖം.....

നിന്റെ ഊര്‍ജ്ജം
ക്ഷിപ്ര മോഹങ്ങള്‍ക്ക്
ചിറകുകളേകിയാല്‍, നിനക്ക്
ആഹ്ലാദം....

നിന്റെ ഊര്‍ജ്ജം
സര്‍വ്വ വികാരങ്ങളേയും
ഒന്നായ് ഉത്തേജിപ്പിക്കിലോ...
സ്ഫോടനം...

മനസ്സിന്‍ തന്ത്രികള്‍
പൊട്ടിച്ചെറിയും
ഉഗ്ര സ്ഫോടനം, മഹാ-
വിസ്ഫോടനം...

പ്രപഞ്ചത്തിന്നഗാധ
തമോഗര്‍ത്തത്തിലേക്ക്
അലിഞ്ഞുചേരും,
നിത്യശാന്തി.....
***************************

അർത്ഥന

അർത്ഥന
എന്റെ വികാരങ്ങൾ
സ്വപ്നങ്ങളിൽ ചാലിച്ച്...
ജീവിതമാം ക്യാ‍ൻവാസിൽ
ഞാൻ വരച്ച ചിത്രങ്ങൾ,
ഒളിമങ്ങിയ വരകളും കുറികളുമായ്
ചവുട്ടിയരയ്ക്കപ്പെട്ടു......
അചേതനങ്ങളായ്
തെരുവിൽ നിറഞ്ഞു....

ഉച്ചത്തിലുരുവിടാൻ കൊതിച്ച
സ്നേഹ മന്ത്രങ്ങൾ,
കണ്ഠ നാളത്തിലേ തടയപ്പെട്ടു ...
പുറത്തേക്ക് വമിച്ചെന്നാകിലോ,
പുറന്തള്ളപ്പെട്ടേനെ
എന്നെന്നേയ്ക്കുമായ്.....

മനസ്സിന്റെ തീരാത്ത
വീർപ്പുമുട്ടലുകൾ-
ഒരഗ്നിപർവ്വതമായ്
പുകഞ്ഞുകത്തുമ്പോൾ...
എന്റെ അന്തരംഗത്തിലേ-
ക്കെത്തിനോക്കിയ
കുളിർ തെന്നലേ....

നിന്നാർദ്രമാം കൈകളാലെന്നെ
തലോടുമ്പോൾ....
തീയും പുകയും ശമിക്കുന്നു...!!!
നിൻ സ്നേഹോഷ്മളമാം നിശ്വാസം,
പകരുന്നാത്മവിശ്വാസം...
ആർദ്രമാക്കുന്നെൻ,
ക്ഷീണിതമാം മിഴികളെ.....
ഹ്യദയത്തിൽനിന്നുത്ഭവിച്ച്,
നേത്രങ്ങളിലൂടെപ്പൊഴിഞ്ഞ,
സ്നേഹകണങ്ങൾ-
പിഞ്ഞിക്കീറിയൊരെൻ,
ജീവിതമാം ക്യാ‍ൻവാസിൽ
പതിഞ്ഞപ്പോൾ-
അചേതനങ്ങളായ് തെരുവിൽ,
ചവുട്ടിയരയ്ക്കപ്പെട്ട ചിത്രങ്ങൾ
മിഴി തുറന്നു....
ഉയിർത്തെണീറ്റു!!!
അതിൽ ഞാൻ കാണുന്നു,
നിൻ മുഖം...!!!

വികാരങ്ങൾ നടനമാടുന്നു...!!!
സ്വപ്നങ്ങളിൽ വികാരം
സ്ഫുരിക്കുന്നു...!!!
നീ....ഞാൻ തേടിയലഞ്ഞ,
അജ്ഞാത സത്യമോ??!!!

നിൻ തിളങ്ങുന്ന നേത്രങ്ങൾ,
വശ്യമാം പുഞ്ചിരി...
നിഷ്കളങ്കമാം സ്നേഹം...
ആനന്ദോന്മാദങ്ങളെന്നിൽ
നിറയ്ക്കുന്നു.....
ഈ ജീവിതയാത്രയിൽ
ഉണ്ടാവില്ലേ നീ...
എന്നെന്നുമെന്നോടൊപ്പം.......